Վատիկանը Ս. Գրիգոր Նարեկացիին Շնորհեց Տիեզերական Եկեղեցւոյ Վարդապետի Տիտղոս

ԵՐԵՒԱՆ, «Նիուզ».- Վատիկանի պաշտօնական ձայնասփիւռի կայանը հաղորդած է, թէ Ֆրանսիս պապը Տիեզերական եկեղեցւոյ վարդապետի տիտղոսը շնորհած է Հայց. առաքելական եկեղեցւոյ սուրբերէն՝ Գրիգոր Նարեկացիին: Ֆրանսիս պապ իր որոշումը կայացուցած է խորհրդակցելէ ետք Վատիկանի Սուրբերու հարցերու համախմբումի տեսուչ կարտինալ Անճելօ Ամաթոյի հետ:

Այս կոչումը կը տրուի վաստակաւոր աստուածաբաններու: Այս անգամ այդ կոչման արժանացաւ Ս. Գրիգոր Նարեկացին, որ Կաթոլիկ աշխարհին մէջ կը համեմատուի Ս. Օգուստինի հետ, նկատի առնելով առաջին հերթին ոչ թէ անոր աշխատութիւններուն թիւը, այլ՝ ազդեցութիւնը հաւատացեալներուն վրայ:

Նշենք, որ 2015ի Յունուարին, Վատիկանի մէջ աւարտեցաւ Սուրբերու միաբանութեան ժողովը, որուն ընթացքին անհրաժեշտ քայլերու ձեռնարկուեցան Հռոմի պապին նշեալ յայտարարութեան կապակցութեամբ: Այդ ժողովին առաջարկուած էր Գրիգոր Նարեկացիի անունը:

Նարեկացի մեծապէս նպաստած է Հայ առաքելական եկեղեցւոյ զարգացման: Նարեկավանքը, ուր ուսած է Գրիգոր Նարեկացի, 1915 թուականին՝ Հայոց Ցեղասպանութեան ժամանակ, հիմնովին քանդուած է:

Գրիգոր Նարեկացի (951-1003) եղած է ականաւոր աստուածաբան եւ հայ հոգեւոր գրականութեան անզուգական ներկայացուցիչներէն մէկը: Անոր ստեղծագործութիւնները թարգմանուած են շատ լեզուներու, իսկ 1984 թուականին երգահան Ալֆրետ Շնիթկեն Նարեկացիի բանաստեղծութիւններուն հիման վրայ գրած է երաժշտական գործ մը՝ երգչախումբի համար:

Նարեկացիի գլուխ-գործոցը «Մատեան Ողբերգութեան» երկարաշունչ բանաստեղծութիւնն է՝ բաղկացած 95 գլուխներէ (բանք), որոնցմէ իւրաքանչիւրը կը սկսի «Ի խորոց սրտի խօսք ընդ Աստուծոյ» տողով:

Հակառակ այն իրողութեան, որ Նարեկացի միայն 52 տարի ապրած է, ան գրական եւ իմաստասիրական հարուստ ժառանգութիւն ընծայաբերած է հայ ժողովուրդի հոգեմտաւոր հարստութեան գանձարանին:

http://asbarez.com/arm/215706/