Սիբիլի և Նունե Եսայանի համատեղ համերգը Նյու Ջերսիում

Հոկտեմբերի 24-ին Նյու Ջերսիում տեղի կունենա ՀՀ վաստակավոր արտիստ Նունե Եսայանի և պոլսահայ սիրված երգչուհի Սիբիլի համերգը՝ «Կանք, պիտի լինենք ու դեռ շատանանք» խորագրով: Համերգին կմասնակցեն նաև Համազգայինի «Նաիրի» պարախումբը և «Արեգա» երգչախումբը:

«Այս հրավերն ինձ համար շատ մեծ պատիվ է և ուրախություն: Իսկ Նունե Եսայանի պես հիասքանչ երգչուհու հետ նույն բեմում ելույթ ունենալն ինձ մեծ հուզմունք է պատճառել»,-«Հայերն այսօրի» հետ զրույցում ասաց Սիբիլը:

Եթե Նունե Եսայանը կատարելու է երգեր, որոնք ներկայացնելու են 100 տարվա մեր անցած ճանապարհը (Ցեղասպանության ժամանակ գրված երգեր, ոտքի կանգնելու երգեր, խաղաղ ժամանակների՝ 60-70-ական թվականների և Արցախյան հաղթանակի մասին երգեր), ապա պոլսահայ երգչուհի Սիբիլը կկատարի իր երկու ալբոմներում ընգդրկված երգերն ու հայրենասիրական մի քանի կատարումներ:

«Յուրաքանչյուր համերգի ժամանակ սիրտս հուզմունքով և ուրախությամբ է լցվում: Ինձ համար նմանատիպ ձեռնարկների ամենակարևոր ձեռքբերումներից մեկն էլ այն է, որ նոր մարդկանց հետ եմ ծանոթանում: Համերգը վերջանում է, բայց ժողովրդի և արվեստագետների միջև հաստատված անքակտելի կապն ու սերը միշտ թարմ է մնում»,- նշում է պոլսահայ երգչուհին:

Հավելենք, որ համերգը տեղի կունենա ՀՀ սփյուռքի նախարարության և Համազգային հայ կրթական և մշակութային միության ԱՄՆ-ի Արևելյան շրջանային վարչության և Նյու Ջերսիի և Նյու Յորքի մասնաճյուղերի աջակցությամբ:

http://hayernaysor.am/%D5%BD%D5%AB%D5%A2%D5%AB%D5%AC%D5%AB-%D6%87-%D5%B6%D5%B8%D6%82%D5%B6%D5%A5-%D5%A5%D5%BD%D5%A1%D5%B5%D5%A1%D5%B6%D5%AB-%D5%B0%D5%A1%D5%B4%D5%A1%D5%BF%D5%A5%D5%B2-%D5%B0%D5%A1%D5%B4%D5%A5%D6%80%D5%A3/