200 Երիտասարդներ Ստանձնած Են Գամիշլիի Հայկական Թաղերու Ապահովութիւնը

«Արեւելք»ի աղբիւրը նաեւ նշած է, թէ հայկական կեդրոններուն ընդհանուր ծախսերը կը հոգայ շրջանի ՀՅԴ «Վան» կոմիտէն, ինչպէս նաեւ՝ առաջնորդարանն ու անհատ բարերարներ: Աղբիւրին համաձայն՝ շրջանին մէջ ապահովական ծանր միջադէպեր տեղի չեն ունեցած, եւ ամէն գիշեր շրջող մեքենաներ կը գործեն՝ հայկական թաղամասերուն անվտանգութիւնը պահպանելու համար: Կեդրոններուն շուրջ ապահովութիւն ստանձնած են 200 երիտասարդներ, որոնց տրուած են յատուկ անձնաթուղթեր, որպէսզի շրջանին մէջ գործող այլ ուժեր ճանչնան զիրենք: Պահակ հայ տղոց բոլոր պէտքերը՝ հագուստեղէն, առօրեայ սնունդ եւ այլն, կը հոգայ նոյն մարմինը:

ԳԱՄԻՇԼԻ, «Արեւելք».- Գամիշլին կը համարուի Սուրիոյ ամէնէն ապահով շրջաններէն մէկը ներկայիս: Այս մասին «Արեւելք»ին յայտնած է Գամիշլիի իր աղբիւրը: Նոյն աղբիւրը նաեւ ըսած է, թէ շրջանի ընդհանուր ապահովութիւնը ստանձնած է քրտական YPK-ն, որ Քիւրտիստանի բանուորական կուսակցութեան՝ PKK-ի, սուրիական թեւը կը համարուի:

Շրջանին մէջ կը գործեն երկու հայկական կեդրոններ եւ Ազգ. Եփրատ հայկական վարժարանի նախակրթարանն ու միջնակարգը:

Միջնակարգի Միացեալ Ազգ. վարժարանի («Իթթիհատ») աշակերտութիւնը ընդհանուր առմամբ հայ է. կան նաեւ փոքր թիւով օտար աշակերտներ: Կեդրոններուն մէջ կը գործէ շտապ օգնութեան մարմին մը. որեւէ խնդիրի պարագային, հայ բնակիչները կրնան կապ հաստատել այդ մարմինին հետ եւ անհրաժեշտ օժանդակութիւնը ստանալ: Հայկական կեդրոնները ունին նաեւ դեղորայք բաժնելու դրութիւն, եւ ըստ կարիքի՝ դեղեր կը բաշխուին շրջանի հայ բնակիչներուն:

Որոշ ժամանակ մը, շրջանը ապրած է ջուրի սուր տագնապ, ուստի պատասխանատու մարմիններ անհրաժեշտ մեքենաներ (թրաքթոր եւ այլն) օգտագործելով՝ ձրիաբար ջուր տրամադրած են ոչ միայն հայերուն, այլ տեղացի քրիստոնեայ ընտանիքներուն:

«Արեւելք»ի աղբիւրը նաեւ նշած է, թէ հայկական կեդրոններուն ընդհանուր ծախսերը կը հոգայ շրջանի ՀՅԴ «Վան» կոմիտէն, ինչպէս նաեւ՝ առաջնորդարանն ու անհատ բարերարներ: Աղբիւրին համաձայն՝ շրջանին մէջ ապահովական ծանր միջադէպեր տեղի չեն ունեցած, եւ ամէն գիշեր շրջող մեքենաներ կը գործեն՝ հայկական թաղամասերուն անվտանգութիւնը պահպանելու համար: Կեդրոններուն շուրջ ապահովութիւն ստանձնած են 200 երիտասարդներ, որոնց տրուած են յատուկ անձնաթուղթեր, որպէսզի շրջանին մէջ գործող այլ ուժեր ճանչնան զիրենք: Պահակ հայ տղոց բոլոր պէտքերը՝ հագուստեղէն, առօրեայ սնունդ եւ այլն, կը հոգայ նոյն մարմինը: «Արեւելք»ի աղբիւրը նաեւ հաստատած է, որ հայկական շրջանները կ՛ապրին ամբողջական ինքնավարութեամբ, իսկ շրջանի քիւրտ պատասխանատուներուն հետ ունին համերաշխ եւ շինիչ համագործակցութիւն:

«Արեւելք» յառաջիկայ օրերուն պիտի շարունակէ յաւելեալ տեղեկութիւններ փոխանցել Գամիշլիի հայկական թաղամասերու ընդհանուր իրավիճակին մասին։

http://asbarez.com/arm/238627/