Նորվան արքեպիսկոպոսի հրաժարականն ընդունվեց

Հուլիսի 30-31-ին Մայր Աթոռ Սուրբ Էջմիածնում, Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի բարձր նախագահությամբ, գումարվեց Գերագույն հոգևոր խորհրդի հերթական ժողովը` ընդլայնված կազմով:

Ժողովի սկզբում Ամենայն Հայոց Կաթողիկոսը իր գնահատանքը բերեց խորհրդի անդամներին, որ ընդառաջ հրավերին ժամանել են Մայր Աթոռ` քննարկելու Հայաստանյայց Առաքելական Եկեղեցու առջև ծառացած զանազան մարտահրավերներ, հայ հավատացելոց կյանքը հուզող խնդիրներ: Ժողովի նիստերն ատենապետեց Կոստանդնուպոլսի հայոց պատրիարքության Պատրիարքական ընդհանուր փոխանորդ Տ. Արամ արքեպիսկոպոս Աթեշյանը:

Գերագույն հոգևոր խորհրդին Հայոց ցեղասպանության 100-ամյա տարելիցին նվիրված` Մայր Աթոռի միջոցառումների վերաբերյալ զեկույց ներկայացրեց հանձնախմբի ատենապետ, ԱՄՆ Արևմտյան հայոց թեմի առաջնորդ Տ. Հովնան արքեպիսկոպոս Տերտերյանը: Ժողովականներն իրենց գնահատանքը հայտնեցին հանձնախմբին` հանձնարարելով շարունակել միջոցառումների ամբողջացման և նախապատրաստման աշխատանքները:

Գերագույն հոգևոր խորհուրդը նաև ի գիտություն ընդունեց Մայր Աթոռի դիվանապետ Տ. Արշակ եպիսկոպոս Խաչատրյանի զեկույցը Թեմական ուղենիշային կանոնադրության պահանջներին թեմերի կանոնադրությունների համապատասխանեցման գործընթացի վերաբերյալ:

Տեղեկություններ ներկայացվեցին սեպտեմբերի 21-28-ը Մայր Աթոռում գումարվելիք Հայ Եկեղեցու Ընդհանուր եպիսկոպոսաց ժողովի նախապատրաստական աշխատանքների մասին:

Եկեղեցական ներկայացուցչական ժողովի կանոնադրության նախագծի լրամշակման աշխատանքների մասին զեկույցով հանդես եկավ հանձնախմբի նախագահ, Տավուշի թեմի առաջնորդ Տ. Եզնիկ արքեպիսկոպոս Պետրոսյանը: ԳՀԽ անդամները գնահատանքով ընդունեցին զեկույցը` թելադրելով հանձնախմբին շարունակել կանոնադրության լրամշակման գործընթացը:

Գերագույն հոգևոր խորհուրդը քննության առավ Ֆրանսիայի հայոց թեմի առաջնորդ, Արևմտյան Եվրոպայի հայրապետական պատվիրակ Տ. Նորվան արքեպիսկոպոս Զաքարյանի հրաժարական գրությունը, ինչպես և Ֆրանսիայի հայոց թեմում դրան առնչված զարգացումների հետ կապված հարցեր:

Հետ քննարկության Գերագույն հոգևոր խորհուրդն ընդունեց Տ. Նորվան արքեպիսկոպոս Զաքարյանի հրաժարականը Ֆրանսիայի հայոց թեմի առաջնորդի, Արևմտյան Եվրոպայի հայրապետական պատվիրակի պաշտոնից և Գերագույն հոգևոր խորհրդի անդամությունից և խնդրանք ներկայացրեց Վեհափառ Հայրապետին հաստատելու այն:

Գերագույն հոգևոր խորհուրդը նաև ափսոսանք հայտնեց հրաժարականում Մայր Աթոռ Սուրբ Էջմիածնի և Ամենայն Հայոց Կաթողիկոսի հասցեին ուղղված անհիմն գնահատականների առնչությամբ: Գերագույն հոգևոր խորհուրդն իր զորակցությունը հայտնեց Ֆրանսիայի հայոց թեմի թեմական խորհրդին ստեղծված իրավիճակի կարգավորման գործում` հորդորելով նաև թեմի հավատացյալներին և ազգային հաստատություններին ու կազմակերպություններին` քրիստոնեական սիրո ոգով նպաստել Ֆրանսիայի հայոց թեմի բարեկարգությանը և շինությանը:

Զոհասեղանին է Նորվան Սրբազանը

Գարեգին Բ կաթողիկոսի նախաձեռնությամբ հուլիսի 30-ին սկսվեց Գերագույն հոգևոր խորհրդի ժողով: Ժողովի զոհասեղանին է դրված Ֆրանսիայի թեմի առաջնորդ Նորվան արքեպիսկոպոսի վիրավորված արժանապատվության իսպառ ոչնչացման հարցը:

Նորություն չէ, որ հայ եկեղեցու եպիսկոպոսներն ու վարդապետները անխտիր «ըմբոշխնել» են Գարեգին Բ-ի մահացու վիրավորանքներն ու հարվածները մասսաների առջև: Սակայն, ի տարբերություն Նորվան արքեպիսկոպոսի, համարձակություն չեն ունեցել փրկել իրենց ինքնասիրությունն ու հոգևորականի վիրավորված արժանապատվությունը: Անմիաբան եպիսկոպոսները շարունակ իրենց անկարողությունը թաքցնելու համար ապարդյուն ու անիմաստ են համարել իրենց իրավունքները պաշտպանել և Ամենայն Հայոց Կաթողիկոսի տիտղոսի թիկունքում թաքնված վրեժխնդիր անձին խոսք հասկացնել: Կարծես թե անհույս հույսով սպասել են հրաշքի:

Իսկ այս վիճակից լիուլի օգտվել է Գարեգին Բ-ն:

Ու հիմա առաջիկա ժողովին մասնակից հոգևոր և աշխարհիկ անդամները Գարեգին Բ-ի մատի մեկ շարժումով կկատարեն նրա կամքն ու քմահաճույքը: Հանուն Գերագույն հոգևոր խորհրդի` հայտարարությամբ հանդես կգան ու ձայների մեծամասնությամբ կպաշտպանեն Գարեգին Բ-ին` խստագույնս դատապարտելով

«անհնազանդ, ճշմարտությունը խեղաթյուրող, զրպարտիչ ու անպարկեշտ» Նորվան սրբազանին:

Ահա հնազանդ, նվիրյալ և բարեպաշտ Նորվան Սրբազանի 45 տարվա գնահատականը…

Այս ամենի արդյունքում «արդարադատ, հանդուրժող, ներողամիտ ու անսխալական» կաթողիկոսի ձեռամբ եկեղեցում կհաստատվի կարգուկանոն: Մահացու բոլոր մեղքերով կդատապարտվեն, եկեղեցուց կհեռացվեն կամ կհետապնդվեն բոլոր նրանք, ովքեր կփորձեն հակադրվել արեգակնափայլ ամենայն հայոցին` Գերագույն և Անփոխարինելի հրամանատարին:

Մենատեր կաթողիկոսի հակաօրինական գործողությունների պատճառով հեղինակազրկված եկեղեցականներն ու բարեպաշտ ժողովուրդը կշարունակեն դոշ տալ նրա համար: Պատվավոր ելքեր կփնտրեն խնդրահարույց, անհավասարակշիռ, անկանխատեսելի ու անկառավարելի կաթողիկոսի «բարի համբավն ու սրբազնասուրբ պատիվը փրկելու» համար ու բաձրաձայն կհայտարարեն` «Շեֆը ճիշտ է, շեֆն արդար է, իմաստուն ու ամենակարող»:

Եվ դարից երկար ձգվում է եկեղեցու շուրջ խայտառակությունները ...

Յո՞ երթաս, կաթողիկոս:

Մաթևոս Հ.

30.07.2013 Hraparak